Vos-avèz dit : « Djustice ! »

An France, ène pôve feume, qui s’ vôrén d’ ome a batu dès-anéyes

d’ asto, a stî condan.néye a dîj ans d’ prîjon pou l’ awè tuwè,

tél’mint qu’èle d’aveut s’ sô di yèsse flayîye tous lès djoûs a r’toûr di

bras. Il-a falu qu’avou sès fîyes, èle dispinse ène masse di liârds pou

dalér an-avant, pou qu’anfin, ô bout d’ quatre ans, èl présidint lyi fèye

grâce, djusse deûs djoûs d’vant l’ nouvèl an. Èyèt co : ène feume di lwè

a trouvè a r’dîre paç’ qui « ç’ asteut foute dju èl travay dès-avocats èyèt

dès jûjes », s’apinse a lèy. Dji m’ dimande bén si èle dîreut l’ minme si

ça s’reut s’n-ome qui l’ âreut batu come plâte, pou in-oyi ou pou in

non, tous lès djoûs, dispûs l’ cén di s’ mâriâdje ?

A costè d’ ça, on cwince dès djins didja fôrt bén conus dèl djus-

tice. Is sont-st-a leû cénquième mwés côp. On sét bén qu’is sont co

pus dandj’reûs qu’èl diâle. Môgré tout, on l’s-èrlache deûs-eûres après,

djusse èl tins di lieû d’mandér dès contes.

« I gn’ a pus pont d’ places dins lès prîjons ni dins lès-iscoles di corèc-

sion », parèt-i !

On l’s-èrmèt an lîbèrté adon qu’ i-gn-a fôrt a gadjî qu’is s’ aprèss’nut a fé in co pus mwés côp ! Come d’èfèt, deûs djoûs pus târd,on l’s-èrcache paç’ qu’is sont passès a l’ake ! Èç côp ci, is-ont tuwè dès vîyès djins, viyolè in-èfant, ène feume qui r’vèneut di s’ travây ou qu’aveut l’ abitude di couru ène dimi-y-eûre tous lès djoûs. 

Is-ont brotchi avou in camion d’ssus dès pôjêrès djins qui ’stîs al fièsse. Is-ont satchi dins l’ foule avou in fusik a rèpèticion, quand ça n’ èst nén s’ fé èsplôsér dins ’ne sale di spèctake, èyèt n’ impôrte èyu ç’ qui i-gn-a dès djins rabind’lès.

Tél côp, adon qu’ is sont r’cachis, a çu qu’on dit..., is d’meur’nut

dès mwès d’ asto a leû môjo ; is s’ pourmwin’nut minme dissus l’

tchumin, sins qu’èl police èyèt leûs vijins ni s’ dè rindîche conte... Leûs

fréres èyèt leûs parints n’ avît jamés r’mârqui in cand’jmint d’atitude

ni ène ôte façon d’ pinsér èyèt d’ pârlér. Si on n’ crwèt nén ç’tèle la, is

vont nos dè stitchî ène ôte !

Co mieus ! Ô pus moûdréls qu’is sont, ô pus ́ di drwèts qu’is-

ont ! Insi, is-ont l’ drwèt di d’meurér moyas quand is pass’nut ô tri-

bunâl, a tél pwint qui, minme leûs-avocats d’ont leû sô, paç’ qui, s’is

n’ voul’nut rén dire, i gn’âra jamés moyén d’ comprinde comint ç’ qui

leûs nouvias mésses ont fét pou lès rinde ôssi wargnas ́ èyèt timbrès,

su si wére di tins ? !

S’is n’ voul’nut nén yèsse rèvoyis dins l’ payis èyu ç’ qu’ is-ont

foutu l’ mârgaye pou passér an jûj’mint, is pouv’nut r’fusér; on s’ ploye

a leûs quate volontès...

Pa d’vant leûs crimes èyèt leûs cârnâdjes, dès-omes di lwè ont

pinsè qu’i fôreut lieû r’ssatchî èl nacionalitè du payis. È bén, ç’ n’èst

nén a crwêre, i-gn-a co dès céns ô gouvèrneumant èt dins lès-organ-

ismes di disfinse dès drwèts qui n’ voul’nut nén ! Pouqwè ?... C’ èst

yeûs ́ qui dîj’nut al tèlèvision èyèt su Intèrnèt ́ qu’is n’ ont pont d’

rèspèt pou nos payis, pou nos lwès, pou nos crwèyances, pou nous-

ôtes. Pour yeûs ́, nos ’stons tèrtous dès mècrèyants paç’ qu’ on n’ vout

nén vikî a leû môde.

Is n’ ont d’ rèspèt pou rén ni pou pèrsone, d’ayeûrs ! Adon,

pusqu’is sont si mô pinsants pou l’ payis èyu c’ qu’ is-ont vu l’ djoû, qui

lieû-z-a donè a mindjî, qui lieû-z-a donè èl moyén d’ dalér a scole pou

aprinde in mèstî, ou bén qui lès-a scapè dèl misére du payis d’ èyu ç’

qu’ i gn’ a wére, is-ont d’vu r’luvér l’ dache... is n’ ont nén a profitér dès-

avantâdjes èyèt dès drwèts dès payis civilisès qu’is wèy’nut si mô èvî !

Intrè nous, i lieû fôt tout d’ minme awè tcheû saquant côps al

valéye dèl bèrce èyèt d’ssus leûs tièsses pou crwêre qui c’èst tél’mint

mieus èyèt pus bia dins leûs payis èyu ç’ qui lès djins crèv’nut l’ mis-

ére, qui leûs mésses, co pus sots qu’yeûs ́, ont tout distrût, èyu ç’ qu’i

gn’ a pus qu’ dès monchas d’ cayôs èyèt dès rwines.

Pusqu’i gn’a qu’ ça qui lieû fét pléji : ès ́ fé pèri pou dalér râd’mint

r’touvér leûs sèptante deûs couméres dins leû paradis, qu’is dalîche ès ́

tuwér dins leûs contréyes qu’is wèy’nut tél’mint vol’tî, èt qu’ is nos lèyîche

tranquîyes pâr ci ! On n’ dè pout rén s’is n’ sav’nut nén vîr dès djins con-

tints, s’amûsér èyèt rîre a sclats, s’is n’ sav’nut rén vîr di bia.

Ça n’ èst nén a nous-ôtes a candjî nos-abitudes !

A costè d’ ça, on fôrce dès djins a s’acusér dès môs qu’is n’ont nén

fét, tél’mint qu’on flaye dissus sins r’lache, niût-èt djoû. On n’ tént nén

d’dja conte di tout ç’ qui prouve leû-n-inocince. I fôt in coupâbe ! Èt

come is-ont ’ne saquî a disgouviène...

Môrts èscrans èt afwèblis, on lieû fét signî dès papîs qui vont lès-

èvoyî ô prîjon dès-anéyes d’asto, djusqu’ô momint qu’èl vré coupâbe va

yèsse discouvru, lontins après.

Ène ôte indjustice : dès djins qui sont dès vrés boûrias avou leûs-

èfants, qui lès tûw’nut a fôce di lès bate, di lès privér d’ mindjî èt di n’

nén lès sognî, on l’s-èrlache après ène gârde a vûwe ou après deûs,

trwès mwès d’ prîjon. On lieû trouve dècirconstances atténuantes

:leû-n-èfance maleureûse, èl peû d’ leû nouvia galant... come si ça

s’reut dès bounès résons pou fé passér s’ grogne dissus dès-èfants !

Dès-ôtes qui roûl’nut sins pèrmis èt qui tûw’nut dès djins, paç’

qu’is-ont bu saquants vêres di trop, sont ètou léchis an lîbèrté.

 Â mins,c’èst vré ! C’èst l’ fiyoû du mayeûr...

Qwè dis ́ on ? T’apèles ça dèl djustice, twè ? On dîreut qu’èle ni fét

quasimint rén pou pûni lès tièsses a mwés vices èyèt lès-inspétchî d’

fé leûs mwés côps. Mins, èle ni lache nén d’ èdvintér dès radârs toudis

pus pèrfècsionès pou sawè t’ foute in procès si tu dispasses d’in pwèy

èl vitèsse ôtoriséye, çoula, pou rimpli lès késses di l’ètat.

Lès céns qui gangn’nut dès liards a l’iscoupe èt qui fristouy’nut

pou dè muchî l’ trwès quârt, quand lès contribucions lieû tchèy’nut

d’ssus lès rins, is sav’nut toudis bén trouvér dès-omes di lwè avè qui

ç’ qu’is sont bén camarâdes, pou fé tchér ́ l’ afêre, pou qu’ is n’ fuchîche

nén condan.nès come is duvrît l’yèsse èt qui ça n’ fuche nén scrît dins

leû câsièr judiciére !

Mins twè, roublîye di dèclârér dîj eûros, tu vas vîr lès miséres qui tu

vas awè èyèt lès dîjènes di miyérs d’eûros qui tu d’vras dalér r’pôrtér !

Il-èst grand tins qui lès djins qui sont-st-ô pouvwêr pinsîche

sérieûs’mint a qwè ç’ qui ça vout dire èl mot « djustice », ey’ a l’ apliquî

come i s’ dwèt, sins parcialitè. Èt qu’is donîche ètou l’ègzimpe an r’wé-

tant a toudis d’meurér bén drwèts dins leûs botes, sins fé yeûs ́ min-

mes çu qu’ is disfind’nut ôs-ôtes !

Dominique VANDERSTOKEN

walon d’ Djumèt (Jumet

)

dalér an-avant : aller en appel/ s’apinse a lèy (a li) : à son avis/ rabind’lès : rassemblés/ moya : muet

.

S'apinse a vous ..(.quand l'timps s'règrigne )

S’apinse a vous !

Owe !

Lès bètchs a crâye,

Lès-orèyes a cacâyes,

tous lès visâdjes al tète,

al place di fé vèrkinér toufêr vos crin.nètes,

fôreut m’choûtér..djusse ène mîyète !

S’apinse a vous, lès malasnès du sintimint,

Sparigne-t-èle co d’ l’ èspwêr èt du bouneûr,

Èl boudène dè l’ gayole as-eûres

Ou bin n’i d‘meure-t-i pus

Qu’ amèrès-agon’rîyes

Èt du désèspwêr a l’invîye

Pou 'ne inocène come mi

Qui vouleut seûl’ mint sinte,

Sayî, r’wétî..vîr vol’tî ?

S’apinse a vous 

lès brûleûs tchandèles a deûs bouts,

Lès-afuteûs d’ tchicot’rîyes,

Dins çu què dj’ crwèyeu yèsse èl courti dè m’ vîye,

Lès doûceûs, lès biatès, lès djip’ rîyes

N’ s’ront-èles toudis qu’ dès puns d’ coupète ?

Dijèz-m’, lès tchîyeûs d’ djèts,

Lès-agnantès tchawètes,

Aqueuwéye a ‘ne pèkéye dè scrèpès

Bètchète a talon

T’t-ô- di lon d’ène voye sètche a crayas ?

Èt quand is s’ léront ridér fét-a-fét d’ leû convoye,

Tous cès rapias, sclèpe a sclèpe,

Come in tchap’lèt d’as aminès,

Dijèz-m’ lès disgoustès,

S’apinse a vous..

Duvré-dje ètou

Rapièç’tér leûs byin tènes linçoûs ?

Owe !

Lès fèyeûs d’arnôjes,

Lès-agraweûs moukèts,

Lès djouweûs d’asperdjèsse,

Tous lès fôtcheûs a crombès djèsses

S’apinse a vous…

Come ène gade ô piquèt,

Duvré-dje m’alanmi lontimps

A racatoûrnér dins m’ pôve tièsse,

Mès corâdjes di tièstu bôdèt,

Mès-ènondons apasturès,

Mès d’zîrs meûris sins pont d’avance,

Lès bias visâdjes trèvèyus d’astchèyance ?

Èyèt vous

Lès pigneûs ô moncha du tout-fét,

Lès r’nig’teûs a l’èfôrt,

S’apinse a vous..

Combin d’anéyes d’afiléye,

Duvré-dje mi brogn’tér,

Cinq quârts pa djoûrnéye,

Pou rôv’lér ,tènawète,

Deûs, trwès crawieûsès jwès,

Saquants plindus pléjis

Tchamoussès su lès bôrds ?

Dijèz-m’ lès r’lètcheûs d’ pélons,

Lès scumeûs d’ bouyon,

Tous lès mougneûs d’ crassès plat’néyes

A vo-n-idéye..

Gn-ara-t-i, al fin, in bèrnatî d’ samwène

Pou z-èbârquî arî d’ mès-îs

L’ ramonç’lâdje dès bèrdoûyes

Qu’ dès-apowès d’ bouboûye

R’nôd’ nut a disgouviène

Dins l’ choû d’ mès djoûs…

Longs come dès djoûs sins pwin ?

Owe !

Lès fouteûs d’alblouke,

Lès djilèts al dèboukle,

Lès plomeûs d’ pouyons,

Pou in côp què djè vos tin a dints

Què vos l’ voulîje ou non

Èm’ mèsse fôra l’ choûtér..djusqu’ô coron !

S’apinse a vous..

maflès dès platès voyes,

« Cus d’ jate » dè l’aspoye,

Quand djè d’âré m’ sô 

d’aplédi l’ suweû dè m’ coyène

Pou n’ gangnî , môgré m’ pwène

Qu’ène toute pètite djoûrnéye d ‘ bèguène,

èrsuwéye trop souvint pô vint d’ bîje

Dè toutes vos canây’rîyes

Èl bîléye pia dè m’ vikérîye

Léra sûnér in dérin wayin d’ vayandîse,

Quand djus d’ dinréye,

Dji m’ rafîy’ré d’ètinde bômér a vo-n-èglîje

L’eûre advènûwe d’èm dérène chîje,

Dijèz-m’, lès bounès-âmes

Sèréz co al donéye ?

Âré-dje ètou drwèt al ranch’néye

D’in Djudas qui dîra platèzak

Qui n’a jamés vèyu m’ casaque,

Qu’i n’ m’a jamés ètindu brére,

Qu’i n’ comprint rin a rin

Èt co mwins’ a lès-èspènes

Èy’ a lès scorîyes

Qui s’aclap’nut a m’ keûr

Come dès boutons d’ sôdard ?

S’apinse a vous,

mès fréres qu’on lome dès-omes,

Lès bons apôtres,ô djoû, a l’eûre,

Pou ‘n’ inocène dè m’ sôte,

Gn-âra-t-i d’ asârd

Qu’in tchin t’t-ossi couwatchi qu’ mi

Pou r’lètchî vol’tî l’s-arachures

Dè toutes vos boûriat’rîyes

Èt pou gripér, piane piane, a mès costès

L’ tiène a cayôs

Qui mwin.ne ô pîd dèl crwès ?

S’apinse a vous..

Mins dj’ î pinse..pinséz, vous ?

Gn-a-t-i seûl’mint in pwès d’ consyince,

Gn-a-t-i seûl’mint in pwès d’ cèrvèle

Pa d’zous vos tchapias-bûses

Èt vos bonèts d’ fôsse dintèle ?

Danielle Trempont

in" D'ome èt d' soya "

Nos zûnâdjes. èl bourdon