Pèneûse samwène...

Photo prise sur ce blog

Lès mascarâdes sont woutes !

Lès mascarâdes sont woutes. Dèdja, on r’tchôfe Boulome Iviêr a côps d’ grands feus qui r’glatich’nut su lès vilâdjes èt lès-amias. Lès clokes aprèss’nut leûs bagâdjes. Èles vont bin râde s’èdalér ô lon ayu ç’ què lès poûyes èt lès-oûs sont-st-an chôcolat !

Lès couméres vont s’ mète a dalâdje : carôs, ridôs, trot’wêrs ; èl môjo tout ètîre èyèt co lès adjèts vont passér al sav’néye , istwêre dè fé oneûr a l’ boune séson , a Pôques èy’ a lès pâquîs, a lès tribouléyes dès clokes èrvènûwes ô payis èt dispôrdant leûs- amonicions pa t’ t’avô lès djârdins cafloris.

Lès mascarâdes sont woutes !

Apicèz brouches èt sayas…après l’iviêr gn-a dèl bèsogne pour tous lès bras.

I fôt qu’ tout r’lûje dèvant qu’ad’vène èl’ pèneuse samwène pa ç’ qu’èl vèrdi dè ç’ samwène la , i n’ s’ra nin quèstion d’ fé l’ buwéye èt co mwins d’èrlavér l’ môjonéye .

Dins dès famîyes qu-i-gna , ç’ djoû la , on cût du pwin ou bin dèl tôte. A no môjo, dispûs toudis , on cût dès-aféres qu’ont in drole dè p’tit no !

Dj’asteu toute gamine èyèt m’ grand mére aprèsteut dèl farène èyèt dès djèts :

«  Tu vas faire quoi ? –C’est Vendredi Saint, no p’tite et je vais cuire !– Le Vendredi Saint ? C’est quoi et pourquoi tu dois cuire ?- Pa ç’ qu’ aujourd’hui, le Bon Dieu bénit la femme qui cuit et maudit la femme qui lave- Ah !…-Et tu vas cuire quoi ?- Dès « coûyes dè Swisse « - C’est quoi des « coûyes dè Swisse ?- Tu verras dans ton assiette !

Tèrmètant qu’elle mè rèspondeut m’ grand mére aveut prèsti fèl’mint dèl blanke pôsse. Et vèl’ la qu’èle dè f’yeut dès boulots qu’èle aligneût  : bodès sôdârds su in blank drap d’mwin.

Dins ’ne grande cass’role ,èle aveut m’tu d’ l’eûwe a tchôfér dispûs in momint èyèt ç’t-èle ci cominçeut a chîlér doûç’mint.

Vî popa, bin seûr ,asteut la pou mète ès’ grin d’ sé : «  No p’tite, vos dalèz vîr , lès boulomes, èl grosse boudène qu’is vont bin râde awè !

L’eûwe n’aveut nin pièrdu s’ timps, èle chufleut d’ dja après l’ bèsogne…

An m’ dèmandant qué goût èç’ qu’èles dalîne awè , ç’ djoû la, dj’é r’wéti cûre lès blankès boudènes .

Èm’ grand mére apiceut lès boulots , lès lèyeut bèroulér douç’mint dins l’eûwe qui f’yeut dès p’tits bouyons. Avè sogne, èle lès r’toûrneut d’vant d’ lès rascoude avè s’n-èscum’rèsse. « R’wétèz ô bûre « , d’jeut-èle a Vî Popa qui m’f’yeut dès clignètes pa drî s’ dos !

«  R’wétèz ô bure …èt mètèz l’ tâbe ! » 

Lès «  coûyes «  ès’ ramonç’lît dins –in grand plat …

Dins m’pètite assiète, djè l’s é vèyu r’lûjantes dè bûre fondu èyèt d’ roudje suk.

« C’est bon ? –- Mmm, oui, c’est bon , j’aime bien les coûyes dè Swisse , tu en feras encore la semaine prochaine, même si ce n’est plus le Vendredi Saint…»

tant qu’a mi, dj’é continuwè a lès vîr vol’tî cès-aféres la qu’ont in no qu’on n’pout nin dîre quand on-è-st- èn-èfant bin al’vè.

L’eûre d’ôdjoûrdu, lès timps ont bin candji. Lès afêres què ç’asteut l’môde sont ’ne mîyète pièrdûwes dins l’s-aroutinâdjes èt lès courât’rîyes dès djins qu’ont toudis trop pô d’eûres pou vikî.

Mins, amon nos-ôtes, èl Vèrdi Sint, c’èst toudis l’djoû dès « coûyes dè Suisse ». Dispûs d’ s-anéyes, c’èst m’ moman qui lès prèsti et paç ‘qu’èle sét què d’ seû ‘ne miyète galafe èle dè cût ène grosse plat’néye…qu’ èle vièrse dèssus du bûre dè cinse tout djusse fondu èy’ ène boune pougnîye dè suk di pot … On n’ sint nin qu’on mindje ! Cès-aféres la ça diskind tout seû, c’èst tout simpe , c’èst bon…on-a l’minton qui glète… !

Wétèz rin qu’ dè pinsér à cès couyes la, djè m’ sin toute drole …L’anéye qui vint, ô Verdi Sint, sèré-dje co l’èfant qu’on lyi fét cûre sès p’tits bouneûrs ? 

Danielle TREMPONT

PS.Les attributs des citoyens de la libre Helvétie n'ont rien à voir dans cette dénomination. Il s'agit plutôt de ceux des gardes suisses du Vatican, dont les culottes de peau collantes mettent en relief leur virilité. et nos friandises ont vraiment la forme de ce qu'elles représentent...

Ingrédients: 1kg de farine, 4 oeufs, beurre, 75g levure de boulanger
Pour saupoudrer : sucre, cassonade, beurre à volonté.
Préparation: Mettre la levure dans un peu d'eau sucrée. Faire fondre le beurre. Mélanger la farine avec les oeufs entiers. Ajouter la levure délayée puis le beurre et travailler du bout des doigts pour obtenir une pâte genre pâte à pain. Laisser lever. Faire bouillir de l'eau et au moment de l'ébullition, prendre des cuillerées de pâte et laisser gonfler dans l'eau. Retourner les pâtons pour bien cuire des deux côtés. Lorsque la couque suisse est bien gonflée et cuite, la sortir de l'eau et bien égoutter.
On peut cuire plusieurs couques en même temps mais toujours dans l'eau bouillante.
Servir avec du beurre fondu et de la cassonade brune.
Quand toutes les couques sont cuites, et s'il en reste, les couper en carré le lendemain et réchauffer dans une poêle avec du beurre. Lorsque ces carrés sont bien dorés, servir avec du sucre. C'est très bon et nourrissant.

S'apinse a vous ..(.quand l'timps s'règrigne )

S’apinse a vous !

Owe !

Lès bètchs a crâye,

Lès-orèyes a cacâyes,

tous lès visâdjes al tète,

al place di fé vèrkinér toufêr vos crin.nètes,

fôreut m’choûtér..djusse ène mîyète !

S’apinse a vous, lès malasnès du sintimint,

Sparigne-t-èle co d’ l’ èspwêr èt du bouneûr,

Èl boudène dè l’ gayole as-eûres

Ou bin n’i d‘meure-t-i pus

Qu’ amèrès-agon’rîyes

Èt du désèspwêr a l’invîye

Pou 'ne inocène come mi

Qui vouleut seûl’ mint sinte,

Sayî, r’wétî..vîr vol’tî ?

S’apinse a vous 

lès brûleûs tchandèles a deûs bouts,

Lès-afuteûs d’ tchicot’rîyes,

Dins çu què dj’ crwèyeu yèsse èl courti dè m’ vîye,

Lès doûceûs, lès biatès, lès djip’ rîyes

N’ s’ront-èles toudis qu’ dès puns d’ coupète ?

Dijèz-m’, lès tchîyeûs d’ djèts,

Lès-agnantès tchawètes,

Aqueuwéye a ‘ne pèkéye dè scrèpès

Bètchète a talon

T’t-ô- di lon d’ène voye sètche a crayas ?

Èt quand is s’ léront ridér fét-a-fét d’ leû convoye,

Tous cès rapias, sclèpe a sclèpe,

Come in tchap’lèt d’as aminès,

Dijèz-m’ lès disgoustès,

S’apinse a vous..

Duvré-dje ètou

Rapièç’tér leûs byin tènes linçoûs ?

Owe !

Lès fèyeûs d’arnôjes,

Lès-agraweûs moukèts,

Lès djouweûs d’asperdjèsse,

Tous lès fôtcheûs a crombès djèsses

S’apinse a vous…

Come ène gade ô piquèt,

Duvré-dje m’alanmi lontimps

A racatoûrnér dins m’ pôve tièsse,

Mès corâdjes di tièstu bôdèt,

Mès-ènondons apasturès,

Mès d’zîrs meûris sins pont d’avance,

Lès bias visâdjes trèvèyus d’astchèyance ?

Èyèt vous

Lès pigneûs ô moncha du tout-fét,

Lès r’nig’teûs a l’èfôrt,

S’apinse a vous..

Combin d’anéyes d’afiléye,

Duvré-dje mi brogn’tér,

Cinq quârts pa djoûrnéye,

Pou rôv’lér ,tènawète,

Deûs, trwès crawieûsès jwès,

Saquants plindus pléjis

Tchamoussès su lès bôrds ?

Dijèz-m’ lès r’lètcheûs d’ pélons,

Lès scumeûs d’ bouyon,

Tous lès mougneûs d’ crassès plat’néyes

A vo-n-idéye..

Gn-ara-t-i, al fin, in bèrnatî d’ samwène

Pou z-èbârquî arî d’ mès-îs

L’ ramonç’lâdje dès bèrdoûyes

Qu’ dès-apowès d’ bouboûye

R’nôd’ nut a disgouviène

Dins l’ choû d’ mès djoûs…

Longs come dès djoûs sins pwin ?

Owe !

Lès fouteûs d’alblouke,

Lès djilèts al dèboukle,

Lès plomeûs d’ pouyons,

Pou in côp què djè vos tin a dints

Què vos l’ voulîje ou non

Èm’ mèsse fôra l’ choûtér..djusqu’ô coron !

S’apinse a vous..

maflès dès platès voyes,

« Cus d’ jate » dè l’aspoye,

Quand djè d’âré m’ sô 

d’aplédi l’ suweû dè m’ coyène

Pou n’ gangnî , môgré m’ pwène

Qu’ène toute pètite djoûrnéye d ‘ bèguène,

èrsuwéye trop souvint pô vint d’ bîje

Dè toutes vos canây’rîyes

Èl bîléye pia dè m’ vikérîye

Léra sûnér in dérin wayin d’ vayandîse,

Quand djus d’ dinréye,

Dji m’ rafîy’ré d’ètinde bômér a vo-n-èglîje

L’eûre advènûwe d’èm dérène chîje,

Dijèz-m’, lès bounès-âmes

Sèréz co al donéye ?

Âré-dje ètou drwèt al ranch’néye

D’in Djudas qui dîra platèzak

Qui n’a jamés vèyu m’ casaque,

Qu’i n’ m’a jamés ètindu brére,

Qu’i n’ comprint rin a rin

Èt co mwins’ a lès-èspènes

Èy’ a lès scorîyes

Qui s’aclap’nut a m’ keûr

Come dès boutons d’ sôdard ?

S’apinse a vous,

mès fréres qu’on lome dès-omes,

Lès bons apôtres,ô djoû, a l’eûre,

Pou ‘n’ inocène dè m’ sôte,

Gn-âra-t-i d’ asârd

Qu’in tchin t’t-ossi couwatchi qu’ mi

Pou r’lètchî vol’tî l’s-arachures

Dè toutes vos boûriat’rîyes

Èt pou gripér, piane piane, a mès costès

L’ tiène a cayôs

Qui mwin.ne ô pîd dèl crwès ?

S’apinse a vous..

Mins dj’ î pinse..pinséz, vous ?

Gn-a-t-i seûl’mint in pwès d’ consyince,

Gn-a-t-i seûl’mint in pwès d’ cèrvèle

Pa d’zous vos tchapias-bûses

Èt vos bonèts d’ fôsse dintèle ?

Danielle Trempont

in" D'ome èt d' soya "

Blanc Nowé

Blanc Nowé !

On direut qu’èl niût èst dûre d’orèye .Èl djoû a bin du mô di s’ fé ètinde. Gn’a nin in brût qui r’djibèle djusqu’à m’ fènièsse. On direut qu’èl vilâdje tout ètîr djoûwe a la bèle du bwès qui dôrt .

Bin seûr, dispûs saquants djoûs, l’iviêr nos a moustrè qui ç’ qu’asteut mésse. Ayêr , lès nuwâdjes astît come dès spès monchas d’plomions prèsses a s’lèyî tchér su no casaque…..

Raboulotéye dins mès couvèrtes, dji n’é nin fôrt l’invîye di m’ èrsatchî dèl doûce tchaleû qui m’ fét dîre mès pâters t’ossi fôrt qu’ èl gris marou qui sokîye al bèbèye mins… ostant d’pôjèrté…s’reut-i posibe què… ?

Èl djârdin a l’ér’ d’ène tôte al frèche crème !

Il-a nîvè dèl niût !

Nowé èst tout blanc !

Alèz , valèt , i fôt dèskinde , skeûre èl feu èr’kèrdjî s’ grosse boudène. Abîye, moman, i fôt rimpli l’ coqu’mwâr , èl mète a tchôfér, moûre èl cafè…mète èl tâbe …quand i fét freud, i fôt s’ noûri ! Ayêr on -a cût du pwin èt dès cougnous a grossès boutroules …c ’èst d’ séson , i fôt qu’on dè profite !

L’èstûve ronfèle èy’ èl coqu’mwâr chufèle.Qué bèle djoûnéye qu’on va vikî !

Nowé èst tout blanc !

Gn-a pont d’ tins a piède , i fôt scurér a blanc lès fiêrs du trin.nô pou qu’ i chore ô pére dès poûces ! Dins l’ vilâdje , i gn-a dès tiènes qu’on va dalér tout d’ chûte chakinér l’ coyène !.

In trin.nô fèrè a glace, c’ è-st- ène prom’tance di fèls ridâdjes èyèt d’ ramonç’lâdjes ène mîyète crus .D’asârd min.me qu’on s’ècrol’ra an-èsprès…pou fé come avè lès-ôtos -skotèr’

Nowé èst tout blanc !

Dès tchôsètes di grand pére , dès gros solérs , in boukèt d’ gazète pou wârdér sès pîds bin tchôds, deûs tricotès qui pèrd’neut toute èl place dins-in pal’tot qu’on s’ sint strit’chot d’ dins ! In bonèt , èn’ èchârpe…

Asseûrè qu’ on poura dalér conte èl frèdeû…pèstèlér dins l’nîve, fét in boulome qu’ôra bèl ér avè s’ tchapia a mode dèl vile, dès boutons gros come dès gayètes alignis su l’ boudène dè s’ pârdèssus…

Nowé èst tout blanc !

On va criyî, couru èt djipér come dès sots On va s’coutrouyî dins l’nîve , pourchûre sès soçons avè dès boules èglacéyes qu’on-èvoy’ra tous sès pus fôrts s’aclatchî dins leû cô .

Qué djoûrnéye qu’on va passér !

Seûrmint qu’on s’ra scands môrts quand nos mames crîy’ront après nous-ôtes. Contints come dès bossus, on rintèr’ra piyane piyane a no môjo, lès machèles afeuwéyes,lès narènes al dèlibèréye .

Seûrmint qu’on âra fwin , fwin a z-awè s’ cô tous sès dints, ène fwin d’leup qu’i n’ fôra nin trin.nér à noûri !

Nowé èst tout blanc !

In côp r’mètu a pantoufes èt casaquin, on s’achîra, pîds sul cadô d’ l’èstûve , an ratindant qu’on côpe èl tièsse a lès cougnous !

On va mindjî come dès rôyeûs  dèvant d’ tchér èdôrmus come dès djon .nes di tchin d’vant l’feu qui zûne ès’ tchanson bin-eûreuse.

Du bûre di cinse su ène spèsse tâye di cougnou, rin qu’ d’ i pinsér , ça fét blèfér!

Nowé est tout blanc !

Èl djârdin a l’ér’ d’ène tôte al frèche crème èyèt mi, dj’é l’âdje qui dj’é…èy’ in keûr qui frum’jîye an spèlant sès souv’nances.

Danielle Trempont

Montigny-le-Tilleul