S'apinse a vous ..(.quand l'timps s'règrigne )

S’apinse a vous !

Owe !

Lès bètchs a crâye,

Lès-orèyes a cacâyes,

tous lès visâdjes al tète,

al place di fé vèrkinér toufêr vos crin.nètes,

fôreut m’choûtér..djusse ène mîyète !

S’apinse a vous, lès malasnès du sintimint,

Sparigne-t-èle co d’ l’ èspwêr èt du bouneûr,

Èl boudène dè l’ gayole as-eûres

Ou bin n’i d‘meure-t-i pus

Qu’ amèrès-agon’rîyes

Èt du désèspwêr a l’invîye

Pou 'ne inocène come mi

Qui vouleut seûl’ mint sinte,

Sayî, r’wétî..vîr vol’tî ?

S’apinse a vous 

lès brûleûs tchandèles a deûs bouts,

Lès-afuteûs d’ tchicot’rîyes,

Dins çu què dj’ crwèyeu yèsse èl courti dè m’ vîye,

Lès doûceûs, lès biatès, lès djip’ rîyes

N’ s’ront-èles toudis qu’ dès puns d’ coupète ?

Dijèz-m’, lès tchîyeûs d’ djèts,

Lès-agnantès tchawètes,

Aqueuwéye a ‘ne pèkéye dè scrèpès

Bètchète a talon

T’t-ô- di lon d’ène voye sètche a crayas ?

Èt quand is s’ léront ridér fét-a-fét d’ leû convoye,

Tous cès rapias, sclèpe a sclèpe,

Come in tchap’lèt d’as aminès,

Dijèz-m’ lès disgoustès,

S’apinse a vous..

Duvré-dje ètou

Rapièç’tér leûs byin tènes linçoûs ?

Owe !

Lès fèyeûs d’arnôjes,

Lès-agraweûs moukèts,

Lès djouweûs d’asperdjèsse,

Tous lès fôtcheûs a crombès djèsses

S’apinse a vous…

Come ène gade ô piquèt,

Duvré-dje m’alanmi lontimps

A racatoûrnér dins m’ pôve tièsse,

Mès corâdjes di tièstu bôdèt,

Mès-ènondons apasturès,

Mès d’zîrs meûris sins pont d’avance,

Lès bias visâdjes trèvèyus d’astchèyance ?

Èyèt vous

Lès pigneûs ô moncha du tout-fét,

Lès r’nig’teûs a l’èfôrt,

S’apinse a vous..

Combin d’anéyes d’afiléye,

Duvré-dje mi brogn’tér,

Cinq quârts pa djoûrnéye,

Pou rôv’lér ,tènawète,

Deûs, trwès crawieûsès jwès,

Saquants plindus pléjis

Tchamoussès su lès bôrds ?

Dijèz-m’ lès r’lètcheûs d’ pélons,

Lès scumeûs d’ bouyon,

Tous lès mougneûs d’ crassès plat’néyes

A vo-n-idéye..

Gn-ara-t-i, al fin, in bèrnatî d’ samwène

Pou z-èbârquî arî d’ mès-îs

L’ ramonç’lâdje dès bèrdoûyes

Qu’ dès-apowès d’ bouboûye

R’nôd’ nut a disgouviène

Dins l’ choû d’ mès djoûs…

Longs come dès djoûs sins pwin ?

Owe !

Lès fouteûs d’alblouke,

Lès djilèts al dèboukle,

Lès plomeûs d’ pouyons,

Pou in côp què djè vos tin a dints

Què vos l’ voulîje ou non

Èm’ mèsse fôra l’ choûtér..djusqu’ô coron !

S’apinse a vous..

maflès dès platès voyes,

« Cus d’ jate » dè l’aspoye,

Quand djè d’âré m’ sô 

d’aplédi l’ suweû dè m’ coyène

Pou n’ gangnî , môgré m’ pwène

Qu’ène toute pètite djoûrnéye d ‘ bèguène,

èrsuwéye trop souvint pô vint d’ bîje

Dè toutes vos canây’rîyes

Èl bîléye pia dè m’ vikérîye

Léra sûnér in dérin wayin d’ vayandîse,

Quand djus d’ dinréye,

Dji m’ rafîy’ré d’ètinde bômér a vo-n-èglîje

L’eûre advènûwe d’èm dérène chîje,

Dijèz-m’, lès bounès-âmes

Sèréz co al donéye ?

Âré-dje ètou drwèt al ranch’néye

D’in Djudas qui dîra platèzak

Qui n’a jamés vèyu m’ casaque,

Qu’i n’ m’a jamés ètindu brére,

Qu’i n’ comprint rin a rin

Èt co mwins’ a lès-èspènes

Èy’ a lès scorîyes

Qui s’aclap’nut a m’ keûr

Come dès boutons d’ sôdard ?

S’apinse a vous,

mès fréres qu’on lome dès-omes,

Lès bons apôtres,ô djoû, a l’eûre,

Pou ‘n’ inocène dè m’ sôte,

Gn-âra-t-i d’ asârd

Qu’in tchin t’t-ossi couwatchi qu’ mi

Pou r’lètchî vol’tî l’s-arachures

Dè toutes vos boûriat’rîyes

Èt pou gripér, piane piane, a mès costès

L’ tiène a cayôs

Qui mwin.ne ô pîd dèl crwès ?

S’apinse a vous..

Mins dj’ î pinse..pinséz, vous ?

Gn-a-t-i seûl’mint in pwès d’ consyince,

Gn-a-t-i seûl’mint in pwès d’ cèrvèle

Pa d’zous vos tchapias-bûses

Èt vos bonèts d’ fôsse dintèle ?

Danielle Trempont

in" D'ome èt d' soya "