Françoise Marcelle. Nos scrîjeûs.

Walotèrapîye

"L'humour et le rire sont excellents pour la santé et sont un antidote contre le stress"

C’èst l’ vré, c’èst su l’ twole !

Rîre, ça èvoye dè l’ocsijin.ne dins tout l’ coûrps, ça rastrint l’ tansion dès muskes, ça fét du bon massådje a lès côtes, ça fét vèrzèlér l’keûr, lès-artêres, lès bouyas.

Adon, ça m’a fét sondjî què nos langue réjionåle c’èst tout l’ minme :ça wårde lès djins in boune santè, bén dins leû tièsse èt dins leû keûr,lômint, lômint. 

Pourtant, i n’a nén la d’ dins dèl chimique, dès consèrvateûrs,dès E300 tchik ou 400 tchak, seûl’mint du bon sé, ène miyète dè pwove èt saquant sclèpes d’as.

Wétèz no Willy BAL, qu’a rafårdèlè s’ satch a 97 ans èyèt qu’ nos avons bustokè come i fôt l’ preumî d’octôbe pou lès cint-ans qu’il asteut skèpi. Qué bias boukèts d’ litèrature walone qu’il-a scrît t’t-ô long dè s’ vikérîye, dins lès bias come lès léds djoûs !

Dju pouroû co lomér droûci in ramonç’lådje dè djins, toudis bén pårlants vikants, toudis scrîjant, djuwant ô tèyåte, asprouvant dè d’néra lès djoûnes d’a ç’te eûre l’invîye dè counwasse èl lingådje dè leus tayons.

Vos-alèz dîre, bén seûr, dju vos-ètind dè d’ ci, qu’i n’a pus qu’ dès vîs soçons pou co d’visér in walon. Môvéjès langues què v’s-astèz ! Mins c’èst tout l’ contrére, savèz : c’èst paç’ qu’is pårl’nèt co, qu’îs scrîj’nèt co èt qu’is s’amûs’nèt co in walon, qu’ cès djins la fèy’nèt mintî lès lwos dès statistiques !

In djoû, in Flamind m’a dit dins in francès parfét (wây, wây, i ’nda con dès céns qui n’ont nén toûrnè casaque pou l’inglès) : « C’est plus convivial la Wallonie ». Bråve Flamind, il-avoût tout compris. 

Bén seûr què nos n’astons nén trisses. Nos vwoyons vol’tî l’ fièsse, què ça fuche pou l’ fotbal, lès Spirous, l’ tèyåte oudoubén nos bias lingådjes. Mès nos savons boutér ètou, quand-o n’ dèsbrîje nén nos-usines pou fé gangnî dès barotéyes dè dolårs a lès Rikins, quand-o n’ dèscharpîye nén nos banques pou l’ pètit Nowé d’ leus-acsionéres. Èt nos counichons èl solidaritè ètou èt si ’ne saqui èst dins l’ bougnoû, i trouv’ra toudis dès bråvès djins pou li lancî ène coûrde.

Wây : « C’est plus convivial la Wallonie ! »

I-n-avoût ène pub qui d’soût : Mettez un tigre dans votre moteur !

Dju vos-acèrtine qu’avè ène boune pal’téye dè mots walons dins l’ breuwète, o rarive ossi long qu’èl fuséye Rosetta.

Rén d’ mèyeû qu’in ramonç’lådje dès-amûsètes dè l’ALWaC èl preumî sam’di du mwos pou vos mète in-ardiè dins vo keûr èt in fèl coq dins l’ moteûr djusqu’ô mwos qui chût.

Nos-astons come èl malåde Sint Tibôt, qui mindje bén èt n’ bwot nén mô. C’èst bén ôjîle avè tout l’ bon mindjî qu’on touve dins nos cinses, avè nos biêres d’abîyes èt d’ôte pårt, avè l’ pèkèt, l’eûwe dè Villée ou bén d’ Chôfontène (a bwòre avè modèråcion).

Mi dju seû rèyusse qu’o n’a jamés fét ène grande ètude a l’univèrsitè pou comprinde comint ç’ què nos-ûsances fèy’nèt du bén pou no vikådje. Adon, dj’é scrît a Maggy no minisse dèl santè pou li spliquî qu’ nos langues réjionåles astin´ bounes pou l’ budjèt d’ l’INAMI, mins o m’a rèspondu platèzak : « Canifèchtône ! »

Dj’é scrît a tous nos minisses dè l’Éducation nationale (i d’a ’ne tricléye) èt is-ont rèspondu qu’èl budjèt asteut bén trop scrèpè pou d’nér dès coûrs dè walon a tous nos p’tits scolîs. Mi dju vwo bén qu’isont rachonè dès liårds pou lès cours dè rien !

Pèt-ète qu’on pouroût bén d’nér lès cours de philosophie et citoyenneté in walon, picård, lorin. Ça f’roût d’ène piêre deûs coûps : tous lèsarnagats ô pîd du minme gayî, lès p’tits tchots vènus dès ôtes payîs come lès p’tits tchots dè d’ci. Èyèt insi, is s’rin´ tèstous seûrs èr asseûrès d’ fé dès vîs-ochas...

Françoise MARCELLE

walon d’ Souvrèt (Souvret)

Dans " èl bourdon" d'octobre 2016