mardi 16 mai 2017

Françoise Marcelle. Nos scrîjeûs







Èmn-ome a mô sès dints, 
pôuve ome. Il-èst maleûreûs come ça n’èst nén d’èl dîre ! Vos savèz bén qu’awè mô sès dints, c’èst pou dèv’ni èradji, èn’ no.

L’ôte djoû, i-n-a tout l’ minme saquantès sèmènes, il-a stî ô
rèstôrant avè sès cous ́, in bia rèstôrant d’ Maubeuge qui chêrt come spècialitè du nuzome lapin as prones. Èmn-ome, bén seûr què c’èst s’ gout, in bon lapin as prones. Vous ́ gadjî què vos-ôtes ètou, c’èst vo goût !

Tout d’in coûp, an-agnant su in rwoyâl boukèt d’ cwisse, il-a pinsè qu’ sès machèles astin ́ dèsbèrlindjîyes ! Il-a yeû d’ l’èlècticitè dèl pwinte dè sès tch’veûs djusqu’ô d’ dèbout d’ sès-årtias. Il-a sinti boudjî ’ne saquè ’ne sadju dins s’ bouche èt il-a pinsè qu’i daloût tchér ́ fèbe.

Asseûrè què ç’ lapén la n’avoût nén stî al’vè dins ’ne gayole, ç’astoût in blanc cu v’nu dirèk du cacheû a s’n-assiète... ou bén d’ l’afuteû a s’n-assiète, alèz savwo, paç’ què çu qu’i s’avoût passè, c’èst qu’il- avoût agni su in plomb d’ chasse. Dins tous lès cas, c’èst bén ç’ qu’o lome a ç’te eûre an francès in circuit court , pou m’n-ome, ç’astoût pu råde in court circuit
.
Dèspûs, èmn-ome a mô sès dints, poûve ome !
Dju n’ va nén vos spliquî toutes lès quéntes pou trouvér in dantisse, paç’ què l’ preumî qui l’a vèyu al clinique, a cénq eûres ô nût, avoût dandji d’ène radio èt, come èl radiolojîye astoût sèréye, faloût r’vèni in ôte coûp... èt co payî ’ne visite, asård ?

Èmn-ome, ça l’a fét andêvér, ça fét qu’il-a stî vîr un deûsième dantisse. Èçti la a fét ’ne radio qui n’a rén moustrè dè skètè ; il-a arindji saquants brokes èt rabistokè ’ne miyète èl dèvanture mès come i n’èst nén aracheû d’ dints, il-a èvoyi m’n-ome dèlé in paradontologiste paç’ qu’i faleut vîr combén ç’ qu’i-n-aveut d’ dints a satchî pou n’ pus awo mô. 

Èl rendez-vous, ç’ astoût twos mwos pus tård... Adon, in ratindant, èmn-ome a toudis mô sès dints, poûve ome !

Il-a d’dja pris deûs coûps dès antibiotiques paç’ què l’infècsion s’a mètu al pwinte dè yun d’ sès dints, èl cén qu’il-a agni avè, d’ssus l’fameûs plomb d’ cacheû.

La ô d’zeûr, èm pa, pou l’ fé amarvoyî, a stî li spliquî què ç’ què ç’astoût, ô bon vî tans passè, in-aracheû d’ dints : ç’ astoût èn-ome qui v’noût su lès martchis avè ’ne tchèrète a bras pou sès-ostis èt surtout in cous ́ pou djuwér du gros tambour. Tant qu’ l’aracheû d’ dints fèyoût s’ bouye, l’ôte djuwoût du tambour tous sès pus foûrts pou èpétchî lès djins d’ètinde lès sclamûres du cén qu’on bouriate.

Dèspûs, èm poûve ome fét dès tchôk’mârs, i s’èrdrèsse tout èdoûrmi dins s’ lit èt i crîye :
« Pont d’ tambour, pont d’ tambour ! »

Èl twozième dintisse què m’n-ome a sti vîr, c’èst l’ bon, parèt-i. I sét fé lès radios, i sét sognî lès chabotes èt i sét royî tafèt’mint lès dints.

I n’a pus qu’ saquants djoûs a ratinde pou yèsse quite dès-angouches.

Dju vos dîré bén råde çu qui va chûre.

An ratindant d’ yèsse quite dè ses dints, èmn-ome èst d’dja quite d’ène masse dè liårds, èt c’èst seûr qu’ i n’ peut pus sinte lès blancs cus come èl cén d’ Maubeuge, paç’ què ç’ ti la, on peut minme dîre qu’i l’a su l’ gros dint qu’i vwot l’ pus vol’tî...





Françoise MARCELLE
walon d’ Souvrèt (Souvret)







Aucun commentaire:

Enregistrer un commentaire

zûnâdje(s)