Vint d'octôbe. Willy Bal.

Vint d'octôbe

Payis d'à nous-autes, ô, dj' vos-é vèyu si vol'tî

Tambourer dins lès marches, èrdjibler al ducace,

Vos fé 'ne bosse à restons, vos dèscrayî l'goyî

Avou l'pèkèt, lès quintes èt lès d'vises qu'on s' èrcasse.

V'là qu'èl campagne èst woute èt dj'èrwéte s'aroyî

L'octôbe roucha, coriant. Djè vous scafyî dès gâyes,

Dès nochètes, dès fawènes, bistoker lès gayîs,

Lès noj'lîs, lès fav'nîs, nachî t't-avau lès-âyes.

Afuter lès spirous èt tinde à grifiyons,

Sinte co 'ne miyète èl gout dès foûyes qu'on ramoncèle,

Astruker avou  'ne pètche, croquer l' pun d' qu'au toûrchon,

Atraper dès longs dints à mindjî dès pèrnèles.

Audjoûrdu, dj'é strinè l' broûyârd qui fét l' tiène bleû,

Raferdèle lès ringuions d' ène casaque dè mateû.

Mièles èt grèves randach'neut dins les fouyas d'courètes.

Pou m' rascandi, au r'cwè, dj'é fét in feu d' èskètes.

Graphie de l'auteur.