dimanche 11 septembre 2016

Louis Marcelle ( Nos scrîjeûs)


Grand compas.


QUAND NOS DALIN´ A SCOLE,
 i d’avoût dins nous-ôtes, in grand, toudis su l’ dérin banc èt qui n’apèrdoût vrémint rén.

Èl mésse avoût tout asprouvè; rén a fé ! Quand ç’ grand la d’avoût s’ soû, i couminchoût a skeûre sès mins èt sès pîds in criyant : « C’èst bon, c’èst bon ».  Adon, valoût mieus l’ lèyî tranquîye.

Ès´ vré no, ç’astoût Jèrård mès pou tout l’ monde, c’ît Grand Compas ou bén Compas tout coûrt. Paç’ què, quand i rotoût, c’ît a grands pas, a vrémint grands pas, in s’aspoyant paf ! paf !su sès grands pîds.

Vos-årîz yeû dit qu’il-astoût in trin d’ mèsurér lès royes dè 
s’ djårdin èt ça fèyoût pinser ô compas qu’ nos-avin´ tèstous pou l’ coûrs dè jèyomètrîye.

Quand vos-astîz in face dè li, i n’ vos r’wétoût jamés ; i r’wétoût toudis ’ne saquè a têre, ène saquè qu’il-astoût tout seû a vîr. O compèrdoût bén qu’i n’astoût nén vrémint come lès-ôtes, qu’i lyi manquoût ’ne saquè, come o d’soût èt o d’avoût pitiè. 

Surtout qu’ sès parints n’astin´ què dès poûvès djins, qu’i n’astoût jamés bén abiyi èyèt, qu’ pou din.nér, èl pin qu’i mindjoût astoût pus souvint du pin sans bûre. O lyi donoût nos torèts d’ pun a scrèpér èt, tîl coûp, in p’tit biscwît.

Dju n’ sé nén comint ç’ qu’il-avoût apris qu’i-n-avoût, èl djeudi après din.nér, ène èscole dè musique. Quand il-intindoût dèl musique ène sadju, il-astoût tout transformè ; il-arètoût d’èrwétî a têre èt i couminchoûta r’wétî èn-ér´, ène saquè qu’il-astoût tout seû a vîr èt i s’ mètoût a bate èl mèsure avè s’ tièsse, avè sès mins èt avè sès pîds comes’i daloût tchér´ dins in mô.

Seûl’mint, adon, o n’intindoût nén dèl musique pa tous costès
come a ç’te eûre ; i n’avoût co qu’ saquants posses dè radio èt saquants machines pårlantes mès tout ça ît råre èt probåbe què c’èst l’ pianô d’ l’èscole dè musique qui l’avoût ratirè.
O-n-avoût asprouvè d’ li aprinde èl solféje mès ça n’avoût jamés rèyussi ; d’ayeûrs, nén lès pènes dè lyi aprinde lès notes paç’ què, su l’ pianô ou bén an tchantonant, i savoût djouwér ou tchantér tout ç’ qu’il-intindoût.

Ça fét qu’in coûp par sèmène, o l’ léchoût ô pianô, djouwér tout ç’ qu’i voloût. Èt la, il-astoût vrémint ôs-anjes !

O-n-a branmint profitè dè s’ passion pou l’ musique ! O lyi a fétdjuwér dèl musique dè danse dès-eûres d’asto dins lès bals an l’ payant avè quasimint rén. Mès pour li, djuwér du pianô, ç’astoûtd’dja gangnî s’ djoûrnéye ! Seûl’mint, ça n’ li donoût nén grand choûse a mindjî !

Quand l’ guêre dè quarante a couminchi èt qu’ toutes lès déréyes ont rôssi, il a atrapè l’ tubèrculôse èt, saquants mwos après, il-astoût dalè pou l’ paradis dès djoûweûs d’ musique ayu ç’ qu’il-åra bén seûr apris a djoûwér dèl trompète avè tous lès-anjes dè l’orkèsse, èt c’èst bén seûr
li qui batoût l’ mèsure avè sès grands pîs d’ Grand Compas…



Louis MARCELLE
walon d’ Coûrcèle (Courcelles)

in èl bourdon n° 687- juin 2016

1 commentaire:

  1. Bravo et merci pour cette page consacrée à notre langue régionale. La
    parution régulière de beaux textes, bien écrits et qui ne soient pas trop
    longs, comme celui écrit ci-dessus par Louis Marcelle, devrait intéresser
    et fidéliser un plus grand nombre de lecteurs. On peut le souhaiter!

    Cordialement,
    Monaux Eric

    RépondreSupprimer

zûnâdje(s)