samedi 11 mars 2017

Raymond Lequeux. Nos scrîjeûs.




Dji n’ sû nén bén poûrtant



Oyi mès djins
 come dins l’ vîye tchanson da Gaston Ouvrard dè 1934
Je ne suis pas bien portant, 
mi ètou dji n’ sû nén bén poûrtant !
Rasseûrèz vous, dji n’ sû nén co près ́ a mori, du mwins dj’ l’ès-
pére, mès dèspûs m’ prépansion, i m’ tchét tous lès-ans d’ssus 
l’ casaque in nouvia problème dè santè,
 èt c’èst toudis yun qu’on n’ sét s’èrfé.
Eûreûs’mint, c’èst jamés rén d’ môrtèl, adon dji m’ sogne èt dji
supoûrte tout çoula ô mieus ; dji prind pacyince, dji mindje mès môs
an-asprouvant dè n’nén trop m’ plinde èy’ an pinsant qu’i-gn-a bén
pus malâde què mi. 
Mès môgrè tout, cès nouvèlès-arokes la, tèrtoutes
èrmîjes èchène, c’èst quand minme dûr a supoûrtér.
An pus, come dji m’ morfond ôjîl’mint, dji sû souvint strindu a
côse dè tous lès dèscouradjants-ègzampes què lès tchafiôds du coron
sont toudis près ́ a m’ chèrvi quand dj’atrape yeune ou l’ôte dè mès
mwéjès-arokes !
Insi in djoû, come dji m’ plindeu dè mès-asoûrdichants-acoufènes, i d’a yun qui m’a spliqui què ç’asteut a côse dè ça què Vincent Van Gogh a dèv’nu djondu èt qu’il-a fini pa coûpér èsn-orèye a côse du brût ! 

Mèrci pratique !
Come dji d’veu passér in-ègzamin pou m’n-eûsofajite dè Barret, i
d’a in-ôte qu’a toudis swè èt qu’èst toudis plin qui m’a djintimint consyi
d’è n’ nén bwêre dè trop paç’ què saquants d’ sès coumarâdes dè ca-
barèt astun ́ môrts dè ça !

 Mèrci vî cous ́ !
Rapôrt a mès pîds qui sont ték’fwès bodès, i d’a yun qu’èst p’t-ète
aspêrt in mècanique èt qui m’a consyi d’èmontchî ène sôrte dè palan ô
d’zeû dè m’ lit pou sawè fé r’montér mès pîds èl pus wôt possibe èy’ insi
doûrmi r’ployi a nonante dègrès. Faleut seûl’mint bén ravisér ô matin si
m’ tièsse n’asteut nén gonfléye ték’fwès qu’ dèl niût, lès-eûwes dè mès
pîds pindus èn-ér ́ s’run ́ dèskindûwes in bas ! Dè l’eûwe dins vo cèrvô,
ça n’ va nén pou l’ fé travayî come i fôt. C’èst d’dja djinti d’ prév’ni !
I-gn-a ètou mès coumarâdes du fotbal. Djé bén stî oblidji d’ leû-
z-avouwér qu’èm rumatisse s’agraveut èt qu’i fôra p’t-ète ramplacér çu
qu’i-gn-a d’ûsè dins mès gn.gnous, mès-antches èt mès spales pa dès
toûrpènes, dès toûrbèles èt dès brokes an plastique, ça fét qu’ dèspûs,
i m’èspot’neut d’dja a l’avance èl Play Mobil
Èt i d’a minme yun qu’a dit qu’i faleut r’tèni m’ place dins-in film d’anticipation
...
Èl pus comique, c’èst l’ cén qui s’ print pou in vètèrinére ! 
Li i m’a acèrtinè qu’ lès saquantès roudjès tatches què dj’é atrapè d’ssus m’
pia, ça vént dèl tigne du tchat èt qu’ ça s’atrape. Dji li é dit què dji
n’aveu pont d’ chat mès qu’ dj’aveu wârdè èl lézârd dè m’ fîye tèrmè-
tant qu’èle ît an vacances. La d’ssus, i m’a rèspondu :
« Dè qwè ! Mès in lézârd, c’èst co pîre, lès grossès tatches dèssus leû
dos, çoula s’atrape ètou rén qu’in lès r’wétant ! »
Èyèt v’la, mès djins, c’è-st-insi qu’ dj’é aprîs què dj’aveu ètou èl
tigne du lézârd. Mès come c’èst yun qui vént d’ Zanzibâr, ça fét qu’
c’èst l’ tigne du lézârd dè Zanzibâr. Quand dji spliqu’ré çoula a m’
mèd’cén, seûr qui va co s’ foute dè mi,
 a mwins qu’i n’ pète èvoye paç’ què c’èst fôrt contajieûs.

An pârlant d’èm mèd’cén, a ç’te eûre pou sès consultâcions, ça va pus râde dè lyi dîre çu qui va co bén al place dè li spliquî tout ç’qui va mô. 
A ç’te eûre ètou, dji dwè dalér l’ vîr dèssus rendez-vous èt i m’ fét passér an swèréye èt an dérin, paç’ qu’i sét bén qu’aveu mi ça va durér lontins !
Aveu tout ça ètou, dj’é in DMG qui lyi kèrtche in bon quârt dè s’ disque dur
; èyèt quand il-a fini d’ tapér su l’ clavièr toutes mès-ôrdo-
nances pou l’apotikére, i fôreut bén qu’i r’mète ène noûve cârtouche
d’anke dins s’n-imprimante.
An tout cas, c’è-st-in foûrt bon mèd’cén paç’ qu’il-arive a prinde pa-
cyince dè mi èt qu’i trouve toudis lès mots qu’i fôt pou m’ rapôjî èyèt m’èr-
montér l’ morâl... Sôf què ték’fwès, i fét dès frouches quand minme !
C’èst come quand i m’a dit què pou m’n-âdje dj’asteu plus-ou
mwins an boune santè. Mès mi, dji cwè què c’è-st-ène carabistouye, paç’
què, an d’sant ça, il-èst d’vènu tout roudje èyèt i r’wéteut toudis ô pla-
fond. Adon ç’ qui m’ fét transi, c’èst l’ mwins du plus-ou mwins. A m’ dé-
rène consultâcion, il-a minme lachi deûs côps, sins l’ voulwêr, dès
paroles qu’i n’âreut nén d’vu. An m’fèyant rintrér, i m’a dit tout sési :
« Ah ! Je ne pensais pas te revoir ! »
Mès t’t-ossi râde, i s’a r’pris an rajoutant
«... de si tôt 
Èyèt an drouvant l’uch pour mi vûdî, tout compatichant, il-a sèrè
yeune dè mes mwins intrè lès deûs sènes pou m’ dîrpou m’ dîre :
« Bon courage, surtout bon courage !»
Què pinséz co d’ ça ?
An pus, ès ́ brâve feume èst mèd’cén ètou, èyèt come c’èst lèy qui
sogne èm feume, i-gn-a saquants côps què, quand èle lè wèt, èle lyi
d’mande an fronçant sès sourcis :
« Et votre mari, comment va-t-il ?»
Èn ́ trouvéz nén ça drole ?
Èt c’èst nén co tout ; èl dérin côp qu’èm feume èst r’vènûwe dè s’
mèd’cén, al chîje, èle m’a d’mandè si tout asteut bén d’alûre aveu l’as-
sûrance vîye. Co in côp, què pinséz d’ tout çoula ?
Èt i-gn-a co ’ne fameûse rawète ! Pou m’angouchî ène bètchéye dè
pus, i-gn-a ètou l’intèrnèt ́ aveu sès sites médicôs, leûs statistiques,
leûs-èsplicâcions... S’apinse a yeûs ́, an 2001, dji n’ dèveu nén d’dja
passér l’anéye, èyèt dèspûs don, dj’âreu bén du mori ène dîjène dè
côps ! An pus, a côse dès fameûs Cookies espions, a ç’te eûre dèssus
l’ twèle, on m’invoye, souvint sins prév’ni, dès rèclames pou dès
pompes funébes.
Ça fét qu’ vos d’vèz bén comprinde, mès djins, qu’aveu tout ça,
c’èst normâl dè transi ’ne miyète. Mès l’ principâl pour mi, èt çoula
grâce a m’ docteûr, c’èst qu’ dji sû co la, c’èst qu’ dji sé co vîr vol’tî èm
famîye èyèt mès vrés-amis ́, c’èst qu’ dji sé co dalér ô fotbal, al pèche,
a l’ ALWaC, èyèt fé ték’fwès ène riséye come avant.
Minme si pa côps, dji dwè m’ foûrcî ’ne bètchéye paç’ què,
 vrémint, dji n’ sû nén bén poûrtant...



Raymond LEQUEUX
walon d’ Coûrcèle Vî Lîtchamps (Courcelles)



toûrbèle, rondelle / toûrpène, toupie, ici, tête hémisphérique d’un os
/ DMG: dossier médical global.







Aucun commentaire:

Enregistrer un commentaire

zûnâdje(s)