DÎMÈGNE di
Pint’cousse. Nos-arivons timprus mon mès grands parints.
«
Bondjoû, man. Mi pa n’èst nén la ?
– Si
fét, il-è-st-ô tchèri ou bén ô poulî. »
An
lès lèyant d’visér, dji m’èva an courant ô djârdén pou
yèsse li preumiêre pou rabrèssî m’ grand pére. L’uch du
tchèri è-st-ô lôdje. Dji passe mi tièsse èt, pus râde qui d’
dîre bondjoû, dji l’ salûwe an d’jant : « C’èst l’
Pint’cousse ! »
I
s’ ricrèstèye, lèye la l’ bwèsse as grènes, i s’avance an
r’ssatchant s’ mègot, an tout r’choûrbant sès lèpes avou
l’dos di s’ mwin, èy’ i m’rèspont an soumadjant :
«
Èle èst woute ! »
Dji
d’meure pafe èyèt moyate èt ç’ n’èst nén s’ gros bètch
qui m’rint l’ parole. Dji n’ôse nén lyi d’mandér pouqwè
ç’ qui l’ fièsse qui n’a nén co cominci, èle èst d’dja
finîye.
Toute
disbârtéye, dji m’èrva al cûjène.
Li
tchén vént d’lé mi pou bribér ène doudoûce èt rén qu’a l’
vèy triyanér, dj’advine qui m’ pa a stî ô lawôt pou qwé
s’nûlôd èt qu’i va l’asprouvér.
On
va don mârchî !
«
Èle èst woute ! »
I
m’a falu saquants-anéyes di pus pou comprinde çu qui s’ mucheut
pa d’rî cès saquants mots la: li mèyeû, c’èst souvint s’
rafyî di ç’qui va v’nu.
C’èst
asârd pou çoula qui lès makèts a pwène rimètus a place, lès
mârcheûs d’ Djèrpène sondj’nut d’dja al prochène
Pint’cousse, bunôjes qui, pa côp, èle tchèye pus timpe ou
disbôtchis qu’i fâye ratinde mwintcôp pus d’èn-an pou l’
rivikér... come si ç’ fièsse la ni f’yeut qu’ sokyî dins
leû keûr avou èn-oûy toudis drouvu...
Christine
TIERCET
walon
d’ Djèrpène (Gerpinnes)
Aucun commentaire:
Enregistrer un commentaire
zûnâdje(s)